ونحن على أبواب الاستفتاء الكبير.. على أبواب تحديد المصير.. على أبواب الفجر الجديد والحلم السعيد.. الذى طالما حلمنا بيه وعشنا فيه وعشنا ليه.. أدعوك عزيزى القارئ «وعزيزى هنا للمذكر والمؤنث إن شاء الله».. أدعوك للنزول.. عشان نكيد العزول.. وبكل حريه نقول.. نقول رأينا.. من عقلنا ومن قلبنا.. نعم عزيزى.. انزل وقول كلمتك بكل حريتك.. بمزاجك وعلى راحتك وبكيفك ولمصلحتك.. ويقينى هذه المرة بالذات.. بعد كل اللى شفناه وعشناه فى اللى فات.. إن حريتك وراحتك.. ومصلحة بلدك ومصلحتك.. وكيفك ومزاجك.. وكل اللى يلبى احتياجك.. فى إنك تعَلِّم على الزرقا.
عَلِّم على الزرقا
ماتقولش مش فارقة
نعم.. دى حتفيدنا
تنجدنا مالغرقة
عَالزرقا حنعلم
ما كفايه يا معلم
دا اللى فات.. علم
فى القلب بالحُرقة
عالعين.. وعالرمشى
يا خريطة راح تمشى
لجلك.. ما حنامشى
وحنبتدى بجُرأة
لبلدنا.. وولادنا
صدقنى يا سيدنا
نعم.. حتنجدنا
زيِّن بيها الورقة
دستور يصححنا
يظبُطنا.. يصلِحنا
نخرج من المحنة
والغفلة.. والفلقة
وعلم على الزرقا
عمرى ما قلت آه.. ودايماً بقول لأ.. وأقسم بالله.. إنى باقول الحق.. وكل مرة قلت لأ.. طلعت النتيجة آه.. بس المرة دى حاقول آه.. وعندى أمل فى الله.. إن الآه حتطلع آه.. آه واضحة كاسحة.. كاشفة فاضحة.. وحتبقى الفاتحة.. للطريق الجديد السعيد بإذن الله.. آه آه.. آه ألم من كل اللى فات.. وآه أمل فى كل ما هو آت.
مش مجرد آه وخلاص.. دى آه للنجاة والخلاص.. آه للسلام والأمان والسعادة لكل الناس.. شوف يا عزيزى.. بعد ثورة يناير بعدة شهور.. وبالتحديد أثناء انتخابات أول مجلس شعب بعد الثورة.. شوف العبد لله قال إيه.. وإنت إن شاء الله حتفهم اللى عايز أوصل ليه.. على فكرة نشرتها على صفحتى فى الفيس بوك.. وكتبت فى أول كومينت.. اللى حيشتم أو يعك.. حسك عالبوك.. وأعمله بلوك...
ههههههههههههههههههههههههههههه.
تخاريف انتخابات (كتبتها أثناء انتخابات مجلس الشعب بعد الثورة.. آخر ٢٠١١م - بداية ٢٠١٢م):
(نثرية بالعامية المعمية.. فى قضية اللخبطة المصرية)
يا حبيبتى ليه تستغربى؟
إدينى ودنك قربى..
واسمعى آخر كلام..
لو قالوا حجاب اتحجبى..
أو قالوا نقاب اتنقبى..
وارضخى وعيشى فى سلام..
لو بكره قالوا اتمطعى..
ادلعى واتشخلعى..
وإدى تع ظييم سلام..
لو بعده قالوا اتوسطنى..
أنا مطرح مانتا تحطنى..
قولى يا فندم تمااام..
بس وحياة النبى..
اوعى يا أمى تهربى..
وشوفى ساعة الدنيا كام..
اللى فاضل مش كتير..
واللى جاى هو المصير..
والمصير يا مصرنا..
بفضل قوة صبرنا..
حيكون تمام.. حيكون تمام..
وماتخافيش أنا مش حاغور..
ولا حاتنحرر وأثور..
أنا حاستسلم وأنام..
يلا ننام يا مصر..
يلا يا مصر ننام..
وماتسأليش يا مصر ليه..
النوم اليوم أضمن وأسلم..
وماتحلميش بأى شىء..
وأنا أيضاً مش ناوى أحلم..
يلا.. تصبحى على إيييييه؟
الله أعلم.. الله أعلم...
«مخرف»
(ملحوظة: حاول أن تقرأ بالأسلوب العامى الخفيف.. وبتركيز وبتكثيف.. حتى تستوعب التخاريف.. واللى شايف إن الكلام دا عبيط.. ومش حويط وغويط.. يعملى ديليت).
نعم يا عزيزى القارئ هكذا كتبت وهكذا كنت وهكذا أصبحت.. أصبحت أكثر أملاً وتفاؤلاً.. نعم تغيرت واختلفت.. نعم طردت اليأس من قلبى وعقلى وقلت له: يا يأس يا أبو الاكتئاب.. أيوه ثوره مش انقلاب.. نعم أصبحت لا أرى إلا مصلحة وطنى.. نعم رغم ما يدور بداخلى من خلافات وصراعات.. نعم رغم ما كان يملأ عقلى من أفكار وقناعات.. نعم رغم أى شىء وكل شىء.. نعم لخارطة الطريق.. نعم للأمل والعمل بما يرضى الله.. نعم للحياة.
انزل وقول الحق
والحق يا عبدالحق
ينفع تقوله لأ؟!
طبعاً ماينفعشى
اليوم دا غير الأمس
بالجهر مش بالهمس
الحق زى الشمس
إزاى ما يتشافشى
انزل وقول كلمتك
لمصلحة أمتك
برأ بقى ذمتك
وانزل وما تخافشى
أكنّه يوم تلاتين
يالا يا مصريين
ننزل وبالملايين
عشان ما نندمشى
يا مصرى جه دورك
تفرح بدستورك
ظبط بقى أمورك
خلى الهوان يمشى
وعلم على الزرقا
ماتقولش مش فارقة
نعم دى حتفيدنا
تنجدنا مالغرقة
وإلى أن نلتقى مرة أخرى.. دا لو كان فيه مرة أخرى.. لكم تحياتى وأطيب أمانى قلبى.. والسلام عليكم ورحمة الله وبركاته.. وعَلِّم على الزرقا.