( رحت إسكندرية في بداية دراستي الجامعية..ورجعت لها في بداية خطواتي الفنية الأحترافية..ورجعت لها تاني وانا ممثل معروف شوية ورجعت لها تالت في تصوير بعض الأعمال الفنية..ورجعت لها رابع عشان أغير حالتي النفسية وبيني وبينها اسرار وذكريات وحكايات مضحكة ومآساوية)
ورجعتلك
ودموع أمي غي عينياااااا
خوف من حسنك عليااااا
خوف م الماضي اللي كان
وياكي يا اسكندرية
ورجعتلك
وأنا عند البواباااااااات
رجعتني الذكريااااات
اسنين عمري اللي فاتت
صحت
عمري اللى مات
ورجعتلك
ورجلي خدتني على الكورنيش
كان نفسي ارجعلك وأعييييش
وأظبط اللي كااان..الأن
رفض الزمان وقال ما تجيييش
ورجعتلك
ياللي غيرتي في حيااااااااتي
اللي كااااااااااان لسه آتي
بكرة النهاردة..بقي إمبارح
وتاه في عتمة.. ذكرياااااتي
ورجعتلك
حد غيري..حد تاني
حد غير..الأولاااااني
وإنتى لسه زي مانتي
ياحبيبتي يا مجننااني
ورجعتلك
ولولا حسنك..لولا سحرك
ولولا ريحة اليود في بحرك
ماكنت في ..حبك..غرقت
وشباااابي ..دفعته مهرك
ورجعتلك
بشعور عجيب..غريب رهيب
وسمعت صوت اقرب حبيب
لما قاللي وراح في موجة
كل شئ قسمة ونصيب
ورجعتلك
أملا عيني ...بنور بيوتك
وبشوارعك..وبشطوطك
نقشت إسمك..كورة رمل
بس مقدرتش..أشوطك
ورجعتلك
جيتلك وأنا تحت العشرين
ورجعت بزحف ...للستيين
وإنتي الوحيدة اليلي عرفتي
إيه الفرق ..ما بين الإتنيييين
ورجعتلك
ودموع أمي في عينيااااا
خوف من حسنك عليااااا
خوف م الماضي اللي كان
وياكي ..يا اسكندريااااااااا