يا برتقال .بقلم صلاح عبدالله

كل عام وأنتم بخير
يا برتقان

يا برتقان أحمر وصغير..بكره الوقفه وبعده نغير
يا برتقان أصفر وجديد..بكره الوقفه وبعده العيد

يا برتقان أشكال وألوان..يا مطرى على صدر الغلبان
بكره السعد الوعد يبان..دا إحنا بينا وبينه مواعيد
يا برتقان أحمر وصغير..بكره الوقفه وبعده نغير
يا برتقان أصفر وجديد..بكره الوقفه وبعده العيد

بكره وقفة هم الماضى..بكره الحاضر مبسوط راضى
بكره عيد القلب الفاضى..مليان نور وهنا وزغاريد
يا برتقان أحمر وصغير..بكره الوقفه وبعده نغير
يا برتقان أصفر وجديد..بكره الوقفه وبعده العيد

يا برتقان مشاكلنا فى ديلنا..ولاحد غيرنا يحللنا
بإيدينا حنخلص مشاكلنا..لما حتبقى الإيد فى الإيد
يا برتقان أحمر وصغير..بكره الوقفه وبعده نغير
يا برتقان أصفر وجديد..بكره الوقفه وبعده العيد

بكره الثوره حنستثمرها..ندوق حلاوتها ونجنى ثمارها
راح تختارنا وحنختارها..تبقى مسارنا بالتأكيد
يا برتقان أحمر وصغير.. بكره الوقفه وبعده نغير
يا برتقان أصفر وجديد..بكره الوقفه وبعده العيد

يا برتقان أبو سره وبلدى..بكره أجمل بكره يابلدى
بكره يابنتى بكره ياولدى..بكره نقول ونعيد ونزيد
يا برتقان أحمر وصغير..بكره الوقفه وبعده نغير
يا برتقان أصفر وجديد..بكره الوقفه وبعده العيد
صلاح عبد الله

كل سنة وانتم طيبين

مع إنى مٌرهَق جداً .. ومش مبسوط خالص
أتمنى تكونوا مرتاحين جداً ومبسوطين خالص
وكل عام وأنتم طيبين جداً .. ومزقططين خالص
وماتقلقوش .. دا كإن الزمن بيقولى : كدا الحساب خالص
" صلاح عبدالله"

" الدنيـــــــــــــــــــــــــــــــــــا"