الديك

كتبتها لما كان مبارك في مستشفي شرم الشيخ
( نثرية بالعامية المعمية عن االخبطة المصرية الغيير عادية)


أنا الموت يناديك...لبي الندا يا ديك
خلصت خالص خلاص..ولا عادشي شئ في ايديك
ياما دعينا يا ديك..قادر كريم يهديك
بس الجشع عماك..وآه م الطمع عاديك
تلاتين سنة يا ديك..والكون دا كله لديك
سلطة ومال وجاه...والويل لمين يعاديك

والفرخة قالت ليك...اعمل حساب ولديك
فضلت حسابهم علي...يوم الحساب يا ديك
وادي اخرتها وأديك..محسور على ولديك
لا الفرخة قادرة تبيض..ولا انت بتكاكي يا ديك
أما اللي ييجي بعديك..لو فكر يكون زييك
قبل مايطلع ديكنا..حنطلعله مليون ديك

والنهارده 13 ابريل 2013 وبعد مرور اكتر من سنتين وأثناء إعادة محاكمته،
والتي تنحي فيها القاضي للحرج. 
والتقطته الكاميرا وهو يحيي مريديه ومؤيديه بابتسامة عريضة..قوية واثقة..
لقيتني فجأة بقول :

أنا الموت يا ديكنا... ياأعجب وأغرب ديك
من النهارده ياسيدنا مالييش دعوة بيك
كت فاكر ياشيخنا إني أحسن حل لييييك
أتاري المصرييك...لسه متلخبطين فييييك
واللخبطة كل مدى تزيد زيادة علينا وعليك

ناس تقووول كان رحيم وكان كريم وكان ودوود
وناس تقوول رغم الفساد كان الأمان موجوووود
وكان محافظ ع السلام...وكان محافظ ع الحدود
طب هيا الثورة عملت لينا إيه ياعبد الودود؟!
دا فيه ناس بقت دعوتها..يارب يا ديك تعووود
معقولة دي آخرتها؟! ياريت ياديك تعود؟؟!!

والنهاردة 15 ابريل 2013م لقيتني بقوووووول:
الملك لك لك لك...يا صاحب السلطان
انشلنا من دا العك..وارحمنا يا رحمن
دي الشوشرة والشك..سارحين في كل مكان
ماعادشي لينا شكل..ولا عادشي بينا أماان
خايفين يا بكره الأكل..يختفي هوه كمااااان
الرعب مالي الجو..والخوف غزا الوجداان
إنقذنا حتى لو.."كان الإنقاذ إخواااااااان

(دا اللي قلته النهارده..مش عارف قلته ليه؟!)
(ومش عارف بكره أو بعد بكره حقول تاني إيه)