تخاريف انتخابات

(كتبتها أثناء انتخابات مجلس الشعب بعد الثورة )

" نثرية بالعامية المعمية... في قضية اللخبطة المصرية"

يا حبيبتي ليه تستغربي؟ غديني ودنك قربي

واسمعي اخر كلام

لو قالوا حجاب اتحجبي.. أو قالوا نقاب اتنقبي

وارضخي وعيشي في سلام

لو بكرة قالوا اتمطعي.. ادلعي واتشخلعي

وادي تعظييم سلام

لو بعده قالوا اتوسطني..انا مطرح مانتا حطني

قولي يافندم تمااام

بس وحياة النبي..اوعي يا امي تهربي

وشوفي ساعة الدنيا كااام

اللي فاضل مش كتير..واللي جاي هو المصير

والمصير هو الختام

وماتخافيش انا مش حغور..ولا حتنحرر واثور

انا حستسلم وانام

ياللا ننام يا مصر ..ياللا يا مصر ننام

وما تساليش يا مصر ليه..النوم اليوم أضمن وأسلم

وماتحلميش بأي شئ.. وانا ايضا مش ناوي أحلم

يلا ..تصبحي على إيييه؟

الله اعلم..الله أعلم


" مخرف"
(ملحوظة: حاول ان تقرا بالاسلوب العامي الخفيف
وبتركيز وبتكثيف..حتى تستوعب التخاريف
واللي شايف إن الكلام ده عبيط
ومش حويط ومش غويط..يعملي ديليت)