بـــقـــــلـــم
صـــــلاح عــــبـــد الله
-----------------
(( تخاريف قديمه كتبتها قبل الجواز بسنين ))
(( في أوتيل عالبحر بس إيه .. الغرفه بتنين جنيه ))
--------------------------------
في ليله..
كنت بايت ويا صاحبي..
أوم جافا النوم ..
عيوني ..
من قسوة الآلام
سألني صاحبي..
ليه مانمتش ؟!
جيت أجاوب ..
سابني ناااااام
طب ليه يا صاحبي..
دانتا صاحبي..
وكان بدي ..
ناخد وندي ..
في الكلام
طب ليه ما بنامشي ؟!
ماتفهمشي..
لا ليا حبيب..
عاهدته وخان
ولا عندي شكوى..
من الزمان
ولا بايت ..
عليا ديون
ولا خايف..
أموت مجنون
ولا عندي أزمه..
من الجزمه
ولا نفسي..
أغير البنطلون
ولا حامل هم..
الجواز
ولا عاتل عبء ..
الجهاز
ولا قلت كلمه ..
غصب عني
ولا سرقوا مره..
الحلم مني
ولا عمر خوف..
من بكره صابني
ولا عمر حب الدنيا..
سابني
ولا متنمرد ..
ولا متمرد ..
ولا .. عالفقر ثاير
وبدل الغدا والعشا..
بشتري ..
عشر سجاير
وأتكيف وأكتب زجل..
عاللي جوه..
القلب داير
يا بشر
اللي يقول..
دااا مخبول ..
حرد وأقول ..
فشر
أنا قمر
ولا يائس ..
ولا بائس ..
ولا محروم
ولا تايه ..
ولا عاجز ..
ولا .. مهزوم
ولما بنام ..
مع الأحلام ..
بتمنى أموت..
في النوم
طب ليه ما بنامشي ..
ما تفهمشي
صلاح عبد الله
-----------------------------
{صاحبي كان الفنان أحمد آدم في إسكندريه ١٩٨٣م}
{سبحان مغير الأحوال .. ألف حمد وشكر ليك.. يا الله}
{{ يارب .. مصر والنبي }}
[ بحق جاه المصطفى الغالي أحرسها وإحفظها يا الله]